Menneskeretter for alle? HLBT i internasjonalt arbeid.

Det var ei lita, men lydhør forsamling i det internasjonale rommet i studentsenteret ved Universitetet i Bergen mandag 24.november. Møtet om kjønns- og seksuelle minoritetar i internasjonalt utviklingsarbeid var ein del av nord/sør-seminarrekka denne hausten, og var arrangert av Norsk Folkehjelp Ungdom i Bergen. Temaet er høgst aktuelt for Norsk Folkehjelp, som jobbar både med rettighetsbasert utviklingsarbeid internasjonalt og arbeid mot diskriminering lokalt og nasjonalt. Blant seminardeltakarane var det stor interesse for problemstillingane Petter Hojem presenterte.

Petter Hojem arbeider som internasjonal koordinator i Skeiv Ungdom, og kunne fortelje om både Skeiv Ungdoms erfaring med utveksling og samarbeid med organisasjonar i utviklingsland, og om LLH sine erfaringar med større og langvarige internasjonale prosjekt. I eit internasjonalt perspektiv opplever homofile, lesbiske, bifile og transkjønna personar (HLBT) ofte svært vanskelege og farlege forhold. Diskrimineringa desse menneska blir utsett for kan variere frå sosial og økonomisk undertrykking, til politisk forfølging og institusjonell vald. I nokre land er homofili kriminalisert, noko som medfører store utfordringar med internasjonalt samarbeid med organisasjonar som jobbar med desse tema. Slike organisasjonar kan risikere å bli strafferettslig forfulgt eller at medlemmer blir utsette for vald og trugsmål, og blir ofte tvungne til å gå under jorda. Ein må dermed jobbe for å finne alternative måtar å støtte og samarbeide med desse organisasjonane på.

Hojem trakk fram fleire døme på korleis ein kan jobbe med slike saker både i lokal og ein større, nasjonal samanheng. Og at slikt arbeid både er viktig og ikkje minst at det nyttar, var det fleire eksempel på. Hojem presenterte bl.a. eit prosjekt i Nepal, der ein i samband med utarbeidinga av landets nye grunnlov har gjort store framskritt i anerkjenninga av sivile, politiske og økonomiske retter for homofile, lesbiske, bifile og transkjønna personar. Som hittil einaste land i verda har Nepal no offisielt anerkjent det "tredje kjønn" for menneske som ikkje kjenner seg heime i kategoriane "mann" eller "kvinne"!

Slike framsteg er inspirerande, og Norsk Folkehjelp Bergen håper at vi i vår organisasjon vil fortsette å sette eit sterkare fokus på HLBT i vårt arbeid for likestilling, og at dette blir ei sjølvsagt prioritering i vårt internasjonale utviklingssamarbeid!

Dersom du er interessert i å arbeide med desse tema, er du velkomen til å ta kontakt med oss for ein prat om kva ein kan gjere framover.