Norsk Folkehjelp i Libanon

Norsk Folkehjelp (NF) har drive bistandsarbeid blant palestinske flyktningar i Libanon sidan 1982. Målsettinga er å ta vare på og utvikla dei menneskelege ressursane til flyktningane og målbera deira rettar i Libanon og retten til å venda tilbake til heimane sine i samsvar med FN-Resolusjon 194. Med støtte frå norske solidaritetsarbeidarar bygde NF opp eit program som i dag utelukkande vert drive av palestinarar og libanesarar.

Historisk skuldast eit sterkt fokus på utdanning og helse at palestinske flyktningar lever under vanskelege økonomiske kår og manglar grunnleggjande sivile rettar. Dei har ikkje tilgang til det offentlege libanesiske helsevesenet, og tilbodet til UNRWA, FN sin humanitære organisasjon for palestinske flyktningar, er mangelfullt.  

NF driv fire eigne prosjekt i Libanon. I tillegg har organisasjonen sidan 1995 støtta arbeidet til lokale partnarorganisasjonar. I dag mottek eit titals organisasjonar prosjektstøtte. NF støttar og  behandlinga av mineskadde og informasjonsarbeid om minefaren. Gjennom eit eige kompetanse-byggingsprosjekt, freistar NF å effektivisera arbeidet til lokale palestinske organisasjonar slik at fleire kan få meir og betre hjelp. NF samarbeider også med lokale palestinske organisasjonar i “Koordineringsforumet for palestinske organisasjonar som arbeider blant palestinarar i Libanon” og i “Forumet for funksjonshemming” der organisasjonar som arbeider med funksjonshemma, samordnar arbeidet slik at tilgjengelege ressursar blir brukt på ein best muleg måte. NF er også bindeledd mellom desse fora og dei libanesiske nettverka.

Utanom prosjektarbeidet brukar lokalkontoret til NF mykje tid på informasjonsarbeid om situasjonen til palestinske flyktningar. Utanlandske bistandsorganisasjonar, diplomatar, politikarar, forskarar, journalistar og studentar gjestar stadig kontoret, som mellom anna fasiliterer besøk i flyktningleirar. NF ynskjer at omverda skal verta klar over kor vanskeleg situasjonen for palestinske flyktningar er og vil halda oppe fokuset på FN Resolusjon 194, som gir flyktningane rett til å venda attende til heimane sine.